مضامین
لیلة القدر۔ رحمت، مغفرت اور نجات کی رات
✍️:۔ اظہر نصیر
رمضان المبارک کا آخری عشرہ رحمت اور برکت کا خزانہ ہے۔ انہی مبارک راتوں میں ایک عظیم رات آتی ہے جسے لیلة القدر کہا جاتا ہے۔ یہ رات اللہ تعالیٰ کی خاص رحمت، مغفرت اور قبولیت کی رات ہے۔ قرآن مجید میں اس رات کی عظمت کو واضح انداز میں بیان کیا گیا ہے۔
قرآن کریم میں اللہ تعالیٰ فرماتا ہے۔
إِنَّا أَنْزَلْنَاهُ فِي لَيْلَةِ الْقَدْرِ
وَمَا أَدْرَاكَ مَا لَيْلَةُ الْقَدْرِ
لَيْلَةُ الْقَدْرِ خَيْرٌ مِنْ أَلْفِ شَهْرٍ
تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِمْ مِنْ كُلِّ أَمْرٍ
سَلَامٌ هِيَ حَتَّى مَطْلَعِ الْفَجْرِ ۔سُورَةُ القَدْر
ترجمہ۔ بے شک ہم نے اس قرآن کو شب قدر میں نازل کیا۔ اور تم کیا جانو کہ شب قدر کیا ہے۔ شب قدر ہزار مہینوں سے بہتر ہے۔ اس میں فرشتے اور روح الامین اپنے رب کے حکم سے ہر کام کے لئے اترتے ہیں۔ یہ رات سراسر سلامتی ہے طلوع فجر تک۔
اس آیت سے معلوم ہوتا ہے کہ لیلة القدر کی عبادت ہزار مہینوں کی عبادت سے بہتر ہے۔ ہزار مہینے تقریباً تراسی سال بنتے ہیں۔ اس کا مطلب یہ ہے کہ جو شخص اس رات کو ایمان اور اخلاص کے ساتھ عبادت میں گزارے وہ گویا ایک طویل عمر کی عبادت کا اجر حاصل کر لیتا ہے۔
احادیث مبارکہ میں بھی اس رات کی بڑی فضیلت بیان ہوئی ہے۔ رسول اللہ صلی اللہ علیہ وسلم نے فرمایا
مَنْ قَامَ لَيْلَةَ الْقَدْرِ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ۔ صَحِيحُ البُخَارِي
ترجمہ۔ جو شخص ایمان اور ثواب کی نیت کے ساتھ لیلة القدر میں قیام کرے اس کے پچھلے گناہ معاف کر دیے جاتے ہیں۔
ایک اور حدیث میں رسول اللہ صلی اللہ علیہ وسلم نے فرمایا کہ لیلة القدر کو رمضان کے آخری عشرے کی طاق راتوں میں تلاش کرو۔ اس لئے مسلمان ان راتوں میں زیادہ سے زیادہ عبادت کرتے ہیں۔ نماز، تلاوت قرآن، ذکر اور دعا میں مشغول رہتے ہیں۔
حضرت عائشہ رضی اللہ عنہا نے رسول اللہ صلی اللہ علیہ وسلم سے پوچھا کہ اگر مجھے لیلة القدر مل جائے تو میں کیا دعا کروں۔ آپ صلی اللہ علیہ وسلم نے فرمایا۔
اللّٰهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي۔
سُنَنُ التِّرْمِذِي
ترجمہ۔ اے اللہ۔ تو معاف کرنے والا ہے۔ معافی کو پسند کرتا ہے۔ پس مجھے بھی معاف فرما۔
لیلة القدر دراصل بندے اور رب کے درمیان قرب حاصل کرنے کا بہترین موقع ہے۔ یہ رات انسان کو اپنے گناہوں پر توبہ کرنے اور نئی زندگی شروع کرنے کی دعوت دیتی ہے۔ جو لوگ اس رات کو غفلت میں گزار دیتے ہیں وہ بہت بڑی خیر و برکت سے محروم رہ جاتے ہیں۔
مسلمانوں کو چاہیے کہ رمضان کے آخری عشرے میں عبادت کا اہتمام کریں۔ اپنے دل کو اخلاص سے بھر دیں۔ اللہ سے مغفرت اور ہدایت مانگیں۔ یہی وہ رات ہے جو انسان کی تقدیر بدل سکتی ہے اور زندگی کو نئی روشنی دے سکتی ہے۔
اللہ تعالیٰ ہمیں لیلة القدر کی برکتیں نصیب فرمائے اور اس مبارک رات کی عبادت کی توفیق عطا فرمائے۔ آمین۔
غیر جانبدار اور آزاد صحافت کا ساتھ دیں!
نوکِ قلم نیوز ایک آزاد صحافتی ادارہ ہے جو غیر جانبدار صحافت کا علم بلند کیے ہوئے ہے۔ نازیبا اشتہارات سے اجتناب کرتے ہوئے گوگل اشتہارات بند کر دیے گئے ہیں۔ اب یہ سفر آپ کے تعاون کا محتاج ہے۔ خصوصاً قلم کار حضرات سے گزارش ہے کہ ہفتہ وار یا ماہانہ مالی تعاون کے ذریعے اس مشن کو جاری رکھنے میں ہمارا ساتھ دیں۔ شکریہ!
