مضامین
عصرِ حاضر میں پیرنٹنگ (Parenting)...... قسط اول
✍️:. شہباز رشید بہورو
پیرنٹنگ (Parenting)ایک اصطلاح ہے جس کا سادہ مفہوم بچوں کی پرورش اور تربیت ہے۔ یعنی والدین کی جانب سے اولاد کی جسمانی، ذہنی اور اخلاقی نشوونما کے لیے اختیار کیا جانے والا مجموعی طرزِ عمل ہے۔ آج کے دور میں پیرنٹنگ (Parenting) پر بات کرنے کی ضرورت کیوں بڑھ گئی ہے؟ اس کی کئی بنیادی وجوہات ہیں، تاہم میں صرف ایک وجہ بیان کر کے اس مسئلے کی نوعیت کو نہایت سہل انداز میں واضح کرنے کی کوشش کرتا ہوں۔
دیکھیے، دورِ جدید میں انسانی تہذیب و تمدن ارتقائی مراحل سے گزرتے ہوئے اپنے عروج، کلائمیکس (Climax) تک پہنچ چکا ہے۔ زندگی کے ہر شعبے میں ترقی کے ساتھ ساتھ نت نئے چیلنجز (Challenges) اور مسائل نے بھی جنم لیا ہے۔ ان مسائل کا سامنا کرنے کے لیے انسان نے باقاعدہ مختلف فنون اور مہارتیں سیکھ لی ہیں، تاکہ ہر مسئلے کو نہایت ماہرانہ انداز میں حل کیا جا سکے۔ جب تہذیب و تمدن نے یہ نئی صورت اختیار کی تو اس کے اثرات انسانی سماج پر پڑنا فطری تھا، اور یہی تبدیلی آگے چل کر والدین کی ذمہ داریوں میں اضافے کا سبب بنی۔
انسانی سماج سادگی کے دور سے نکل کر پیچیدگی کے مراحل میں داخل ہو چکا ہے، جس کے نتیجے میں بچوں کی پرورش کے حوالے سے والدین کی ذمہ داریاں بھی کئی گنا بڑھ گئی ہیں۔ ایک زمانہ تھا جب بچے سادہ اور فطری ماحول میں رہ کر سماج سے بہت کچھ سیکھ لیا کرتے تھے، لیکن اب حالات یکسر بدل چکے ہیں۔ سماج کی ہیئت تبدیل ہو گئی ہے اور اب وہ اس پوزیشن (Position) میں نہیں رہا کہ بچے کی تربیت مؤثر انداز میں کر سکے۔ اسی تناظر میں والدین کی ذمہ داریاں مزید سنگین ہو گئی ہیں۔
ماضی میں جب بچہ اسکول (School) سے واپس آتا تو والدین کو زیادہ سے زیادہ یہی فکر ہوتی تھی کہ بچہ کتابوں کے ساتھ کب بیٹھے گا اور کھیل کود کی زیادتی سے محفوظ رہے گا، تاکہ اس کی تعلیم متاثر نہ ہو۔ اگر بچہ بالفرض بند کمرے میں کتابوں کے ساتھ مصروف رہتا تو بھی یہی خدشہ رہتا کہ کہیں نیند یا خیالات میں گم ہو کر پڑھائی سے غافل نہ ہو جائے۔ اس صورت میں اگر بچہ تعلیمی لحاظ سے کمزور بھی رہ جاتا تو اس کا ذہنی توازن اور اخلاقی ساخت عموماً محفوظ رہتی تھی۔ اسی طرح اگر بچہ کھیل کود میں زیادہ مشغول رہتا تب بھی اس کی ذہنی صلاحیت اور اخلاقی اقدار برقرار رہتی تھیں۔
لیکن آج کے دور میں صورتِ حال یکسر مختلف ہو چکی ہے۔
ڈیجیٹل (Digital) دراندازی اس قدر گمبھیر ہو چکی ہے کہ اب شاید ہی کوئی فرد اس کے اثرات سے محفوظ ہو۔ ہر شخص کے ہاتھ میں موبائل فون (Mobile Phone) ہے، جو اب محض سہولت نہیں بلکہ ایک بڑی ضرورت بن چکا ہے۔ بسا اوقات بچہ بظاہر بند کمرے میں کتابوں کے سامنے بیٹھا ہوتا ہے، مگر والدین کو یہ تاثر دے رہا ہوتا ہے کہ وہ یوٹیوب (YouTube) یا کسی اور آن لائن (Online) تعلیمی ذریعے سے مطالعہ کر رہا ہے۔ ایسی صورت میں والدین کے لیے بچے کی ذہنی اور اخلاقی حفاظت کی کوئی واضح ضمانت باقی نہیں رہتی۔
ممکن ہے کہ بچہ تنہائی کے باعث آہستہ آہستہ اپنا ذہنی توازن کھو رہا ہو اور اخلاقی اقدار سے بھی دور ہوتا جا رہا ہو، مگر والدین اس حقیقت سے بہ خبر رہیں۔ خاص طور پر آج کے وہ والدین جو سادگی کے ماحول میں پرورش پائے ہیں اور ڈیجیٹل (Digital) دنیا سے پوری طرح واقف نہیں، یا پھر اپنی مصروفیات کے سبب غفلت کا شکار ہو چکے ہیں، بچوں کی طرف مطلوبہ توجہ نہیں دے پا رہے۔ ایسی غفلت کے نتیجے میں بچے نہایت خطرناک ذہنی اور اخلاقی نتائج سے دوچار ہو سکتے ہیں۔
یہی صورتِ حال اس حقیقت کو واضح کرتی ہے کہ جدید دور میں محض والدین کا تجربہ یا نیک نیتی کافی نہیں رہی۔ اس پس منظر میں بچوں کی پرورش کے حوالے سے نت نئی تکنیکوں (Techniques) کو سیکھنا اور اپنانا وقت کی اہم ترین ضرورت بن چکا ہے۔ اب پیرنٹنگ (Parenting) محض ایک فطری عمل نہیں رہی بلکہ ایک باقاعدہ فن، بلکہ ایک مکمل سائنس (Science) کی حیثیت اختیار کر چکی ہے، جس کے ذریعے والدین بچے کی دیکھ بھال اور تربیت کو اس کی فطری اور ذہنی صلاحیتوں کے مطابق بہتر طور پر انجام دے سکتے ہیں۔
اسی لیے پرورش، یعنی پیرنٹنگ (Parenting)، سے متعلق چند بنیادی اور اہم نکات کا بیان ناگزیر ہو جاتا ہے۔
پیرنٹنگ (Parenting) یا پرورش کو اگر جنرلائز (Generalize) انداز میں بچوں کی زندگی کے تناظر میں بیان کرنا ہو تو پیرنٹنگ (Parenting) کو تین پہلوؤں میں تقسیم کیا جا سکتا ہے۔
پہلا: بچوں کی صحت کے تناظر میں پیرنٹنگ
دوسرا: بچوں کے اخلاق کے تناظر میں پیرنٹنگ
تیسرا: بچوں کی تعلیم کے تناظر میں پیرنٹنگ
آج کل پیرنٹنگ (Parenting) کو صرف اور صرف ٹینیجر (Teenager) یا بعض اوقات نوجوانوں کی تعلیم کے گرد ہی مرتکز کر دیا گیا ہے، صحت اور اخلاق کو نظرانداز کرتے ہوئے، جس سے پیرنٹنگ کا ایک محدود تصور سامنے آتا ہے۔ حالانکہ سب سے پہلے آج کے والدین کو بچے کی صحت کے حوالے سے تربیت دی جانی چاہیے کہ وہ ان کی صحت کا خیال کس طرح رکھیں۔
بعض اوقات والدین انجانے میں، بچے کو صحت مند رکھنے کی نیت سے، ایسی سرگرمیاں انجام دیتے ہیں جن کے منفی اثرات بچوں کو پوری زندگی جھیلنے پڑتے ہیں۔ ایک حاملہ خاتون، اس کے شوہر اور گھر کے دیگر افراد کو دنیا میں آنے سے پہلے ہی اس نئے مہمان کی صحت کا خیال رکھنا چاہیے۔ بلکہ جو بچہ ماں کے رحم میں موجود ہوتا ہے، اس کی صحت کا خیال رکھنے سے پہلے ماں کی صحت کا خیال رکھنا یقینی بنایا جانا چاہیے۔
شوہر کو چاہیے کہ وہ اپنی بیوی کو نفسیاتی طور پر تندرست رکھنے کے لیے خوشگوار ماحول فراہم کرے، کیونکہ تحقیقات بتاتی ہیں کہ نفسیاتی طور پر متاثرہ ماں کے اثرات بچے پر بھی مرتب ہوتے ہیں۔ لڑائی جھگڑے کا ماحول، ترش کلامی، طعنہ زنی اور اس کے نتیجے میں ماں کا رنجیدہ ہونا یہ سب عوامل بچے کی صحت کو متاثر کرتے ہیں۔
ایک تحقیق میں جان گوٹمین (John Gottman) نے "دی ہارٹ آف پیرنٹنگ" (The Heart of Parenting) میں لکھا ہے کہ بچے کی گفتگو میں اپنے والد یا والدہ کے جملوں کے اثرات، حتیٰ کہ آواز کے اتار چڑھاؤ کو بھی محسوس کیا جا سکتا ہے۔ بولتے وقت باڈی لینگویج (Body Language) میں بھی ایک سی مشابہت پائی جاتی ہے۔ چیزوں کو سیکھنے کا عمل رحمِ مادر میں موجود بچے کے سننے کے عمل سے ہی شروع ہو چکا ہوتا ہے۔
جاری۔۔۔۔
غیر جانبدار اور آزاد صحافت کا ساتھ دیں!
نوکِ قلم نیوز ایک آزاد صحافتی ادارہ ہے جو غیر جانبدار صحافت کا علم بلند کیے ہوئے ہے۔ نازیبا اشتہارات سے اجتناب کرتے ہوئے گوگل اشتہارات بند کر دیے گئے ہیں۔ اب یہ سفر آپ کے تعاون کا محتاج ہے۔ خصوصاً قلم کار حضرات سے گزارش ہے کہ ہفتہ وار یا ماہانہ مالی تعاون کے ذریعے اس مشن کو جاری رکھنے میں ہمارا ساتھ دیں۔ شکریہ!
