مضامین
انفارمیشن ٹیکنالوجی — جدید دور کی ضرورت
✍️ :- سمعیہ طاریق
جماعت:- نہم.
اسکول :. سن رائز کولیٹی پبلک اسکول کچہامہ بارمولہ .
زیر نگران:- ملک غیاث.
آج کا دور انفارمیشن ٹیکنالوجی کا دور کہلاتا ہے۔ انفارمیشن کا مطلب اطلاعات ہے، جبکہ انفارمیشن ٹیکنالوجی سے مراد ایسے جدید سائنسی آلات اور طریقے ہیں جن کے ذریعے معلومات کو محفوظ، منتقل اور حاصل کیا جاتا ہے۔ موجودہ زمانے میں یہ ٹیکنالوجی انسانی زندگی کا لازمی حصہ بن چکی ہے۔
انسان فطری طور پر تجسس پسند ہے، اسی جستجو نے اسے نت نئی ایجادات کی طرف مائل کیا۔ ابتدا میں سادہ مشینیں وجود میں آئیں جنہوں نے انسانی محنت کو کم کیا، جبکہ پرنٹنگ پریس کی ایجاد نے علم کو عام کرنے میں اہم کردار ادا کیا۔ اخبارات، کتابیں اور رسائل کی اشاعت سے معلومات کی ترسیل میں بے حد آسانی پیدا ہوئی۔
وقت کے ساتھ ساتھ سائنس اور ٹیکنالوجی نے حیرت انگیز ترقی کی۔ ٹیلی ویژن جیسی ایجاد نے دنیا کو ایک گاؤں کی شکل دے دی، جہاں بیٹھے بیٹھے دور دراز علاقوں کے مناظر دیکھنا ممکن ہو گیا۔ اسی طرح کمپیوٹر نے نہ صرف کام کی رفتار تیز کی بلکہ درستگی بھی بڑھا دی۔
انٹرنیٹ نے تو گویا معلومات کی دنیا کو ہماری انگلیوں تک پہنچا دیا ہے۔ تعلیم، کاروبار، تحقیق اور تفریح—ہر شعبہ اس سے مستفید ہو رہا ہے۔ ای میل جیسی سہولت نے پیغام رسانی کو نہایت تیز اور آسان بنا دیا ہے، جہاں چند لمحوں میں معلومات دنیا کے کسی بھی کونے تک پہنچ جاتی ہیں۔
مختصراً، انفارمیشن ٹیکنالوجی نے انسانی زندگی میں انقلاب برپا کر دیا ہے۔ ضرورت اس بات کی ہے کہ ہم اس جدید ٹیکنالوجی کو مثبت اور تعمیری مقاصد کے لیے استعمال کریں تاکہ معاشرہ مزید ترقی کی راہ پر گامزن ہو سکے۔
غیر جانبدار اور آزاد صحافت کا ساتھ دیں!
نوکِ قلم نیوز ایک آزاد صحافتی ادارہ ہے جو غیر جانبدار صحافت کا علم بلند کیے ہوئے ہے۔ نازیبا اشتہارات سے اجتناب کرتے ہوئے گوگل اشتہارات بند کر دیے گئے ہیں۔ اب یہ سفر آپ کے تعاون کا محتاج ہے۔ خصوصاً قلم کار حضرات سے گزارش ہے کہ ہفتہ وار یا ماہانہ مالی تعاون کے ذریعے اس مشن کو جاری رکھنے میں ہمارا ساتھ دیں۔ شکریہ!
